Paragmanok ako sugad han akon amay

An akon pagmanok usa nga pamaagi hin pagpasidungog han akon amay nga parabulang, hi Mardonio Quebec Nartea, Sr.  Kun diri tungod ha iya diri ako nahihibaro bahin hin pagmanok ngan diri liwat ako magkakainteres hin pagmanok.  An akon la ungara hinin akon pagsulod hin pagmanok sugad han akon mga kabugtoan amo an paghatag hin maupay nga ngaran para han akon amay dinhi hini nga iya nagin paborito nga libangan, an pagmangno hin manok nga iburulang.  Hiya nag-arog hin mga manok bisaya nga iya iginpades hin mga mestizo nga hatag ha iya han iya mga kasangkayan, labi na gud han iya patod nga hi Domiciano Sicadsicad.  An iya mga nagin paborito ngan magdaug nga manok amo an lahi han Talisayon nga Hatch Democrat.  Komo hiya nakakarawat hin manok han iya mga kasangkayan, hiya liwat waray maglamot hin paghatag hin manok ngadto han ira.  Ngan hiya usa nga parabulang nga diri paghuygo an panuyo kundi an paglibang ngan panurasura la han bihag nga marasa nga sumsuman pades han bahal nga tuba.